Yehi gar zid tumhaari hai - A Nazm

Yehi gar zid tumhaari hai,

Chalo hum bhool jaate hain!

Sabhi waade, sabhi qasmein,

Mohabbat ki sabhi rasmein,

Nahin, manzoor jo tum ko,

Karein ranjoor jo tum ko,

Tumhaari shaad-maani hi,

Azeez-az-jaan hai jab to,

Tumhein phir tokna kaisa?

Ziyaan-o-sood ki baabat,

Bhala phir sonchna kaisa?

Chalo hum bhool jaate hain!

Mohabbat ki riyazat mein,

Wafaaon ki musaafat mein,

Qadam kis ke kahaan bahkey,

Hui kis se kahaan larzish,

Basa di jis ne ik pal mein,

Hamaari aankh mein baarish,

Ke jis ki tez boondon ne,

Kisi tezaab ki soorat,

Nishaan-e-manzil-e-dil hi,

Jala dala, mita dala,

Magar jaanan...

Kahan aasaan hota hai?

Jigar ka khoon ashkon mein,

Badalna aur bahaa dena,

Khas-o-khashaak chun chun kar,

Gharonda ik banana aur,

Usi ko phir jala dena,

Jawaan sapnon ki laashon ko,

Daroon-e-jaan chhupaa kar,

Muskura dena...

Khizaa'ein paalna khud mein,

Bahaar'ein baant'tey phirna,

Kahaan aasaan hota hai?

Bahot mumkin hai hum bhi haar hi jaayein,

Jawaan hai zabt jo ab tak,

Muqaabil ghum ke aaye,

Aur dhaah jaaye,

Aur is mein bhi ta’ajub kya?

Tumhaare laut aaney ki,

Bachi ho aas jo koi,

Nawa-e-be-zubaan ban kar,

Sisak kar phir se ut'they aur,

Tum tak bhi pahonch jaaye,

So tum se ye guzaarish hai,

Tab ik ehsaan tum karna,

Palat kar dekhna yun sard nazron se,

Ke jo bhi aas zinda ho,

Usey yak-sar mita dena,

Hamein pat'thar bana dena!!!